La Usc di Ladins

Iniann ala fin d’aurí él sté a Balsan les lîtes dl diretif dla Federaziun dla Ciacia de Südtirol. Cun chëstes él ince gnü a s’al dé na müda por ci che reverda la rapresentanza ladina. Luca Complojer d’Al Plan á tut ite le post de Eduard Winkler d’Antermëia. I trëi traverc che Complojer s’á tut dant tirel adöm te trëi noziuns: dialogh, pedagogia, mëte le tier al zënter. Tl spirit dl dialogh ál porchël cherdé ite por i 21 d’otober na sentada danter i surastanc di reviers ladins y l’assessur Daniel Alfreider. Chësta é gnüda a s’al dé tl Naturhotel Delta da Calfosch y al é sté na ocajiun por mëte sön mësa te na manira informala i temesc che ti stá a cör ai iagri. Nos un tut chësta ocajiun por s’la cunté cun Luca Complojer y le damané ci idees che al á por chësc mandat provinzial, che dorará cina dl 2027. Al nes á cunté olache al vëiga les dificoltés y nia inultima ci che al nen pënsa dl lu, che mëss da ël infora gní regolamenté, "denanche al sides massa tert".

La intervista podëise lí t’La Usc di Ladins di 11 de novëmber  (Intervista: Pablo Palfrader)