La Usc di Ladins

La zetola che i cliënc dl pech de Badia ciafa chëstes edemes sön banch dl pech de Badia é dessigü por tröc da incrësce. "Do agn de tradiziun, stlüj le pech de Badia. Stimá cliënc, i Ves lasciun alsavëi che nosta ativité restará daverta cina ai 15.11.2022. Dedô se godunse nosta meritada pensiun. Ringraziun düc os de cör pur Osta fedelté. Giulan!" Cun chëstes pêr de risses y zënza fá le gran sciosciüre, incünda la familia Costner che ara lascia sö l’ativité, porchël stlujará öna dles ultimes botëghes originales y tradizionales de nosta valada. Al vëgn dé sö öna dles furnaries che s’á fat so inom ince sura le paisc fora. Tan gonot aldi pa ince instës tla bassa che le pech de Badia á les mius püces dla valada. Chësc é dantadöt n sëgn de gran aprijamënt. Aprijamënt che an ciafa ince da curfé tl internet, olache ghesć á lascé rezenjiuns che vá dal "miú pan artejanal dla valada", cina a "bunté y jintilëza".

I n’orôn nia che les portes stlujess, zënza recordé val’ fostüs de storia. T’La Usc di Ladins di 11 de novëmber podëise lí deplü.  (pablo)