La Usc di Ladins

La situaziun por i paurs dal lat n’é al momënt en general nia cis plajora: danter cosć de produziun jüs sö dassënn y prisc paiá fora che n’é nia ciamó jüs valis impara, ési te na situaziun nia da sté saurí. Sce al vëgn spo ciamó d’atres mudaziuns danterite, pón ince preodëi che i nerfs vëgn plü trac. Chësc é sozedü dan da püch por na desëna de paurs dal lat a Rina y Antermëia, cun la mudaziun dl sorvisc da dé y tó jö le lat. Cina ala fin d’otober jôra ia valgamia saurida. Pro la maiú pert jô le ciafêr Herbert Rubatscher cun so camion pormez al lüch a ciarié le lat. Cun la fin d’otober é le ciafêr jü en ponsiun, ci che á porté mudaziuns. La lataria á cherié n post de racoiüda dl lat pro le lüch dl Tulper a Antermëia, olache al röia da San Martin sö le camion cun la bot. Por i paurs da Rina dess pié ia en jöbia n secundo mënder auto, n trasport B sciöche al vëgn tlamé, che vëgn da Longega y vá da Rina alta ite cuntra Antermëia. 
I paurs suradic n’é nia cis contënc cun la soluziun y ti á scrit na cherta de protesta ala lataria.

T’La Usc di Ladins di 11 de novëmber podëise lí deplü sön la chestiun. I un ince baié cun le rapresentant dla lataria por la Val Badia, Martin Deval, che nes á splighé co che ara s’á porté pro, y ne vëiga nia ite daldöt les protestes.   (pablo)