La Usc di Ladins

Nooshin Shahkarami é nasciüda a Arak y chersciüda sö a Teheran, tl Iran. Chiló ára vit cina i agn dl'université, canche ara á metü man da se lascé sö cuntra le govern, cuntra n rejim che é en forza da 43 agn (da do la gran revoluziun stada dl 1979) y che drüca jö la popolaziun, en particolar les ëres y i dërc umans. Nooshin é dagnora stada na rebela y propi porchël ê süa vita tl prigo, te n monn olache i tirans ne pënsa nia sura dui iadi da saré ia, torturé y copé chi che n'é nia aüna cun sües ideologies. Insciö á sü geniturs tut la dezijiun da la mené a vire foradecá. Dl 2006 éra rovada tla Talia, a Verona, olache ara á studié inant tla univeristé, te n paisc lëde, olache ara á podü lascé da se vistí le slaier y olache ara á conesciü so compagn Marco. Cun ël éra gnüda a sté a Corvara, mo süa patria, so daciasa, resta inant te so cör. La mort dla jona iraniana Mahsa Amini, copada dala polizia religiosa da Teheran deache ara ne se â nia vistí indortöra le slarier, á descedé de gran protestes y na revoluziun tl Iran. Jogn y dantadöt jones ne azetëia nia plü les regoles dl rejim y se lascia sö por la liberté. Ince Nooshin se bat, da dalunc y sciöche ara pó, por la liberté de so popul y de süa tera.

I ti un fat na intervista, che i podëis lí tla ediziun speziala da indoman, vëndres ai 11 de novëmber.   (kp)