La Usc di Ladins

Dal Vangele do San Lüca, 21, 5-19 
Te chël tëmp, tratan ch’al n’ê n valgügn che baiâ dl tëmpl, sciöch’al ê inforní cun de beles peres y cun ofertes de us, á Gejú dit: »Al gnará n tëmp, dailó ne restarál de döt ci ch’i odëis chiló degöna pera sura l’atra; döt gnará trat jö.« Ai á damané: »Maester, can sozedará pa chësc, y a ci sëgn conesciarán pa che chësc é tl sozede?« Al á respognü: »Metede averda, ch’an ne ves ingianes nia! Deache tröc lovará sö te mi inom y dijará: Iö sun chël!, y: Le tëmp é chiló! Ne stede a ti salté do! Y sc’i aldis baian de veres y de tumulc, ne stede a ves lascé sprigoré da chël! Deache chësc mëss sozede por pröm; mo la fin ne vëgn nia ciamó atira.« Spo ti ál dit: »Al se lasciará sö n popul cuntra l’ater y n rëgn cuntra l’ater. Al gnará de gragn tremoroc y te tröc posć möries y ciaresties; al sozedará cosses da fá pora, y sö al cil odarán de gragn sëgns. Mo denanche döt cant chësc sozedes, jarán porsura os y an ves porseghitará. Por gauja de mi inom ves surandarán ales signories dles sinagoghes, an ves sciurará te porjun y ves condejará dan da resc y governanc. 
Spo podarëise dé testemonianza. Tolesse dassënn dant de ne ves cruzié nia damperfora por osta defenüda; deache iö ves dará ite les parores y la sapiënza, insciö ne sará üsc aversars nia bugn da se mëte cuntra os y da dé decuntra. Cinamai üsc geniturs y üsc fredesc, üsc parënc y üsc amisc ves tradiará, y n valgügn de os coparán. Y por gauja de mi inom ves arán le sënn. Y impó ne ves gnarál gnanca stort n ciavëi. Sc’i restëis frëms, davagnarëise la vita.« 
Parora dl Signur. - Lalt a te, Gejú Crist!