La Usc di Ladins

Ai 15 de novëmber á le Comun de Badia podü pié do la zertificaziun de Comun Clima d'arjënt, che é gnüda reconfermada da pert dla Agenzia Ciasaclima. Indöt él gnü arjunt le 59,9% di punc y le Comun s'á alzé fora sciöche secundo comun miú zertifiché. Cun chësta notizia á l'ombolt dl Comun de Badia, Iaco Frenademez, inauguré la sentada cun la popolaziun, che é stada tl salf dla Ciasa dla Cultura da La Ila en lönesc ai 21 de novëmber. »L obietif de nosc comun é la zerticaziun d'or - á dit le pröm zitadin, che arata dër important chësc da jí tru dl vers dla sostenibilité, deache i podun odëi cun nüsc edli sciöche le clima se müda y porchël messunse ester ajigná da afronté les conseguënzes che i cambiamënc comportará. Le gran impëgn da pert dl Comun de Badia por ci che reverda la sconanza dl clima y dl ambiënt vá inant bele dal 2016 incá y le proscim obietif é chël da mëte jö n plan de sostenibilité, plan che düc i comuns dl Südtirol messará mëte jö anter le 2024. A baié de chësc plan él gnü invié adalerch Sonja Abrate, dl Ökoinstitut, che á tigní n referat online, spligan mosöres y traverc de chësc proiet.
Do le referat de Abrate á l'ombolt y i assessurs porté dant laurs y proiec portá inant tratan l'ann.

Deplü podëise lí tla ediziun da en vëndres ai 2 de dezëmber.   (kp)