La Usc di Ladins

Sciöche mosöra cuntra le gran aumënt pro i ciarburanc, á le govern talian renunzié plü mëisc alalungia a 30,5 cent de "accise" por vigni liter de benzin o diesel. Cun incö 1. de dezëmber é chësc "rabat" gnü smendrí a 18,5 cent, ci che ó dí che al vëgn indô 12 cent plü cer da fossené. N gröm de jënt a en mercui ai 30.11. ciamó tut l’ocajiun da jí a fossené ciarburant por auti y camions, insciö che al s’á alüsc cinamai formé codes pro les fossenares (tla foto él la fossenara dl Nordring a Bornech). La maiú pert fajô le tanch plëgn, valgügn â cinamai canistri da ciarié ite por avëi na resserva.
Chi che á sciafié da fossené, s’á insciö ciamó "sparagné" valch, deache cun incö é i prisc dl diesel indô jüs sura i 2,00€ al liter, i prisc dl vërt ti röia tres plü daimpró.  (pablo)