La Usc di Ladins

Mosoré, ziplé, rafé y limé: chëstes é les parores che acompagnëia les 8 scuadres internazionales che é tl laur chisc dis da realisé a Al Plan les scoltöres tla nëi. Iniann él la 32. ediziun dl snowfestival, olache al é rové alerch artistes y artisć da piz a ciantun. Da plü dalunc vëgn na scuadra dl’Argentina y öna dala Corea dl Süd. Dal ost ca vëgn na scuadra dla Letonia, dal’Africa sö öna dal Maroco. L’Europa é rapresentada cun döes scuadres dla Germania, öna dala Spagna y sambëgn na scuadra dl Südtirol - cun studënc dla scora de lauraziun dla pera da Laas. Preodüda ê ince na scuadra dal’Ucraina, che á indere messü desdí por les rajuns che düc conesciun.
A vigni moda: i teams dles scoltöres tla nëi á tëmp cina en vëndres sëra da rové süa opera; dedô ti passará la parora ala jënt, che podará jí sön la plata Facebook dla Cooperativa Turistica y mëte "me plej" sön la scoltöra che i plej le plü. Intratan jará les scuadres inant a Sanciana, por realisé dailó na secunda opera. Le festival vëgn organisé deboriada dala CT Al Plan/San Martin y dal’AT da Sanciana. Tl’alta Val de Puster sarál spo ince la premiaziun por intrames les localités.  (pablo)