La gran eserzitaziun di Stödafüch adöm cun dötes les organisaziuns de socurs dl'Alta Badia é garatada insëra, jöbia ai 12 de jená, sön Piz Sorega
I pipseri di stödafüch dl'Alta Badia á soné insëra dales 19:25 por n medefüch rot fora tla ütia Piz Sorega a San Ciascian. An savô indere, che chësc iade ne se tratara – por fortüna – nia de n intervënt real, mo de na eserzitaziun, organisada dai Stödafüch da San Ciascian, che á cherdé ite ince i grups da Calfosch, Corvara, La Ila, Badia y La Val y les atres organisaziuns de socurs dl'Alta Badia: le Socurs Alpin, l'Aiüt Alpin, che é rové adalerch cun l'elicoter, la Crusc Blancia y i Carabinieri.
Pro la gran proa él gnü simulé n medefüch tla ütia de Piz Sorega, olache al ê romagnü laite deplü porsones che messâ gní salvades. Por podëi condüje sö alalt döt le material che jô debojëgn él ince
gnü trat ite chi dai lifc, che á messü salté adalerch en prescia por fá pié ia l'implant, che é jü en funziun do da za. 20 menüc. I pröms volontars ê tratan bele rová sön le post cun, rovenon le pick up sö por pista, y cun motoslites. Insciö, anter na mes'ora da canche al ê gnü dé l'alarm, á bele i pröms volontars cun i respiradus podü jí te ütia – olache al n'ê sambëgn nia flames, mo n gran föm artifizial - a chirí i feris. Indöt ê 13 les porsones da salvé, de chëstes êl 11 mëmbri di stödafüch y döes popes. I feris, smincá da mëmbri dla RUD, Realistische Unfalldarstellung, á simulé le panich y le me gaujé dales ferides reportades y é gnüs atira daidá y curá dal Socurs Alpin, aspetan che al rovass adalerch volontars y doturs dla Crusc Blancia che é gnüs condüc adalerch dal elicoter dl Aiüt Alpin, che á spo ince porté demez n ferí. Döes porsones ê ince sciampades jö por bosch y an les á ciafades cun l'aiüt dla drona di stödafüch da La Val, cun chëra che an á sciafié da les odëi fora y ti porté aiüt scialdi atira. L'ega – che an n'á sambëgn nia podü sprinzé sö por le frabicat – é gnüda ciuciada fora tres i slauhs y sprinzada tl bosch jö de sot. Do da feter n'ora â i volontars salvé dötes les porsones y an á insciö podü stlü jö la eserzitaziun, na proa importanta por i volontars – an sciazëia che al nen n'ê indöt passa 120 – che á tut pert cun gran scerieté y impëgn y a chi che al ti vá porchël n gran lalt por döt ci che ai fej por daidé ti momënc de bojëgn.
Deplü sön l'eserzitaziun y d'atri retrac podarëise odëi tla ediziun stampada da en vëndres ai 20 de jená.
(kp)