La Usc di Ladins

Le 2022 é storia y l’ann s’á stlüt jö cun n tëmp gonot da nio y ince scialdi cialdin y töme. Chëstes é ince stades les carateristiches prinzipales dl ultim mëis dl ann. Aladô di dac de na staziun privata a Al Plan, á le mëis albü na temperatöra mesana de -1,2°C. Les temperatöres sot a nul é stades por la gran pert ma de püc y degügn degrá. Ezezuiun á fat l’edema dai 11 ai 18, olache an â da doman plü gonot temperatöres frëides da döes zifres. Le plü frëit él sté ai 12 cun -16,1°C. Chësc frëit é sté la gran fortüna dl setur turistich, ajache ara é jüda da stlopeté cotan de nëi de canun. Y zënza chëra ne fossel degünes pistes en funziun, ince deache chëra dal cil é stada pücia y degüna. Dezëmber nes á cinamai porté plü iadi la plöia. Cis dai 20 de dezëmber inant él gnü n tëmp cuaji cialdin, olache le termometer é rové ia por le de plü iadi a 5 y ince passa 6 gra de cialt. Lapró él sté n tëmp töme, scialdi gonot da nio y – por ci che reverda Al Plan – cun tröc ciarüsc da doman.  (pablo)