La Usc di Ladins

Chësta sajun da d’invern é pordërt piada ia malsigüda. Le gran aumënt di cosć dl’energia y en general di cosć dla vita â lascé tremoré ince le setur dl turism. An se temô che jënt n’ess nia plü le mö’ da gní adalerch, che strotöres n’ess nia albü le mö’ da daurí. Sëgn che le tëmp sterch da Nadé y Nanü é passé ia, podunse dí che ara é jüda atramënter. Söi lifc dl Dolomiti Superski de bi aumënc, arjunjon indô i liví dan le Covid. Insciö é les Dolomites indô stades tera benedida, olache ara é jüda da daurí ince cun pücia nëi dal cil y püch frëit. Altró éra jüda atramënter. La vera tla Ucraina á indere destenü sües ambries sön la sajun de n ater vers. Sorvisc de imprëstaschi á albü dificoltés cun le fornimënt de materiai da jí cui schi. Chi che â bele comané material l’ann passé da d’aisciöda ne l’á dötaurela nia ciafé döt. I sun jüs a damané do pro Manuel Comploi d’Al Plan dl imprëstaschi "Andrea & Marco", che nes á cunté co che chësta pröma pert de sajun á buté y de ci vers che ara á sceché.

La intervista impara podëise lí t’La Usc di Ladins di 20 de jená  (pablo)