La Usc di Ladins

La pista Erta a Al Plan de Mareo é arjignada al top do les temperatöres frëides di ultimi dis. Chësta edema ál lapró novü trëi iadi, ci che abelësc la contrada cun le plü bel mantel invernal. Les atletes gnará ion a Al Plan, tröpes diretamënter en domënia y en lönesc da Cortina d’Anpezo ca. A Al Plan aspeta ince i fredesc Manuela y Manfred Mölgg söles atletes che ai conësc en gran pert dër bun dai agn dl agonism. Al sará döes gares de slalom lerch de Copa dl Monn che portará ince tröp publich a Al Plan y n gran reclam por Plan de Corones che se publizisëia tres plü y plü a livel internazional cun l’inom "Kronplatz".
Atualmënter é l’atleta taliana Marta Bassino söinsom la classifica dla Copa dl Monn de slalom lerch: cun 425 punc, dan ala Shiffrin cun 400 punc. Federica Brignone é da ciafé te chësc classamënt al cuinto post cun 304 punc.
L’ann passé â davagné söla Erta Sara Hector dla Svezia, dan a Petra Vlhova dla Slovachia y la franzeja Tessa Worley. De püc centejims a pe dl podium êl sté Federica Brignone.