Dal vangele do San Mateo 4, 12–23
Do che Gejú â aldí, ch’an â sciuré Jan te porjun, s’ál retrat tla Galilea. Al á lascé Nazaret, por jí a d’abité a Cafarnaum, che é dlungia le lech, tl raiun de Sebulonn y de Nàftali. Ciodich’al dô s’ademplí, ci ch’al é gnü dit tres le profet Isaia: La tera de Sebulonn y la tera de Nàftali, la strada dl mer, la tera delá dal Iordann, la Galilea pagana: le popul che viô tla scurité á odü na löm lominosa; a chi, che viô tl rëgn dl’ambria dla mort, ti él aparí na löm. Da dailó inant á Gejú metü man da incundé: Convertisse! Deache le rëgn dl cil é daimpró. Tratan che Gejú passâ dlungia le lech de Galilea, ál odü dui fredesc, Scimun, nominé Pire, y so fre André, ai ê dër tl sciuré fora la rëi te lech, ciodich’ai ê pesciadus. Y al ti á dit: Gnide do a me! I fajará fora de os pesciadus de jënt. Atira ái lascé dailó sües rëis y ti é jüs do. Da jí inant ál odü dui d’atri fredesc, Iaco, le fi de Zebedeus, y so fre Jan; ai ê cun so pere Zebedeus te barca y arjignâ ca sües rëis. Al i á cherdé, y atira ái lascé la barca y so pere y ti é jüs do a Gejú. Gejú rodâ por döta la Galilea, insignâ tles sinagoghes, incundâ le vagnele dl rëgn y varî tl popul dötes les maraties y les soferënzes.
Parora dl Signur. – Lalt a te, Gejú Crist!
Vangele dla Domënia
3. Domënia ia por l’ann A, ai 22 de jená 2023
Galaria retrac
View the embedded image gallery online at:
https://www.lausc.it/valedes-ladines/val-badia/22351-vangele-dla-domenia#sigProIda6aa3cf839
https://www.lausc.it/valedes-ladines/val-badia/22351-vangele-dla-domenia#sigProIda6aa3cf839