Concurs "Trienala Ladina" y cumpra de laurs "Richard Agreiter"

Data

23 de jené 2023

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Le Museum Ladin de Tor á scrit fora le concurs por la mostra de artisć:tes dles cin’ valades dl Sela, dl raiun furlan y grijun, y ince le "Pest Richard Agreiter" por la cumpra de laurs
Le termin por presenté l’interes y les domandes por tó pert ala "Trienala Ladina" y al "Pest Richard Agreiter" toma dales 12:00 dl 4 de merz 2023. Les novités de chësta ediziun dla gran mostra che é vigni trëi agn ti salfs dles mostres dl Museum Ladin a San Martin de Tor é chëstes: – ince artisć:tes che á bele n iade metü fora pro la "Trienala Ladina " pó fá domanda; – le tema é bele sëgn dé dant (y nia impormó en conseguënza dla seleziun di:les artisć:tes) y é "L’ert desco stromënt de apropriaziun dl monn y invenziun dl monn"; – le curadú é ince bele metü, al se trata dl autur y curadú de galaries y museums Günther Oberhollenzer; – la juria pó cerne cina 7 davagnadus:ësses.

Vigni trëi agn mët da jí le Museum Ladin Ciastel de Tor le concurs d’ert "Trienela Ladina" por sostigní y promöie les artistes y i artisć dles valades ladines dles Dolomites adöm ai atri raiuns retorams dl Friul y dl Girjun tla Svizera. Al é la setima ediziun dla gran mostra. Tó pert pó les artistes y i artisć che vir tla Ladinia (dötes les cin’ valades: Val Badia, Gherdëna, Fascia, Fodom y Anpezo), tl ciatun Grijun y tla regiun Firul–Aunejia–Iulia, y ince les porsones creatives che á n lian cun le monn ladin y se sint a chësta mainira interessé ala storia, ala cultura y ala tradiziun ladina. Tó pert pó en chësc iade ince artistes y artisć che á bele n iade fat pert dla "Trienala Ladina" y dl "Pest Richard Agreiter".

La juria é metüda adöm, dlungia al presidënt che é Günther Oberhollenzer (diretur artistich dla Künstlerhaus Wien), l'artist badiot Lois Anvidalfarei, Silvia Höller (direturia artistica dla RLB Kunstbrücke da Desproch, Stefania Pitscheider (direturia dl museum dles ëres Hittisau tl Vorarlberg) y Lisa Trockner (direturia dl’uniun artistć:tes dl Tirol dl Süd). Azetades vëgn dötes les formes d’ert (ilustraziun, dessëgn, pitöra, grafica, digital art, performance, sound art, fotografia, scoltöra).

La mostra cun i laurs di:les artisć:tes cernü:des jará dai 16 de jügn ai 5 de novëmber 2023 tl Museum Ladin Ciastel de Tor.


Pest "Richard Agreiter"

Paralelamënter ala "Trienala Ladina" se desfira la gara por la cerna y cumpra de operes d’ert en colaboraziun cun l’artist Richard Agreiter. A chësta seleziun pó tó pert artistes y artisć dla scoltöra che vir tla Euregio Tirol cun lapró i trëi comuns de Suramunt che sint da avëi n lian cun la Ladinia, süa storia y süa jënt. Les scoltöres chirides fora dala juria gnará cumprades dal Museum Ladin.

I documënc por tó pert ala Trienala y al Pest Agreiter á da gní metüs dant al Museum Ladin Ciastel de Tor anter les 12:00 dl 4 de merz 2023: por e-mail, a man te secretariat o por posta (al ne vel nia le timber postal). Informaziuns dá le Museum Ladin sot www.museumladin.it  (Iaco Rigo)