La Usc di Ladins

La cherdada por l’Aiüt Alpinisć Alta Badia y ince por i Stüdafüch da Corvara sciöche suport é gnüda avisa chësc mercui al 1. de forá dales 2:55 da doman. I socoridus á messü jí söinsom le lift de "Costoratta" a Corvara, olache döes porsones á albü n inzidënt cun la liösa a motor. Sciöche le surastant dl Aiüt Alpinisć Fabian Oberbacher nes á dit, ê les döes porsones jüdes cun la liösa a motor fora de pista, bonamënter por passé da na pista al’atra. Da passé ái trat n pice salt, á pordü le control y é insciö saltá te na rëi de delimitaziun, toman intrami jö dl meso. Un di dui s’á fat püch y nia, mo l’ater – n jonn dl post de püch plü co 20 agn – án messü condü de prescia cina jön Ciaulunch, olache al aspetâ l’ambulanza cun le dotur d’emergënza. Le ferí é gnü condüt te ospedal da Bornech cun n politrauma y é tl repart de reanimaziun. I Carabiniers fistidiëia sëgn dles inrescides. L’aodanza é sambëgn che döt pois se mëte dl dër vers.  (pablo)