La Usc di Ladins

"Sce nos fajun val’ por le bosch, fajunse ince val’ por nos instësc." Chësta é la convinziun de Giulia Moling da Lungiarü, che ti á dé vita a n proiet particolar, dal inom "Contrada vërda". Düc canc odun de por de nüsc püri bosc, che s’á ciafé te chisc agn na dernada indôlatra. Da dui agn incá él dantadöt l’arlogn che se sleria fora y che á bele atoché tëmples intires. Sce al mancia le bosch, spo él n dann por la natöra instëssa, mo al vëgn ince mancia la proteziun por les strotöres y por la jënt. Lëgns morc tuc fora de bosch, cun dites che s’un tol gonot ince para de sagns lapró. A chësc s’injunta i lëgns che vëgn taiá por d’atres rajuns – strotöres, pistes, frabiches o scemplamënter lignan. Döt natöra che vá a perde.
"Al vëgn dagnora ma tut y tut y tut dala natöra. I me pënsi porchël che al sides gran ora da ti dé ince zoruch val’", dij Giulia Moling. La jona da Lungiarü, che é ince pedagoga dles erbes, á porchël metü en chësta iniziativa che ó indô porté vita nöia sön les tëmples bludres. "Contrada vërda" é na süa idea, te chëra che ara á ciafé sostëgn da Michael Pichler da Bornech y dal’assoziaziun "Umweltring Pustertal" da Valdaora. N proiet che ó tó ite dötes les categories – gragn y pici – por ti dé na man a nosc bosch da podëi florí danü. I se l’un cuntada cun Giulia, por capí plü avisa ci traverc che ara se tol dant cun le proiet y co che vignun de nos pó daidé para.  (pablo)