La Usc di Ladins

Cun 54 agn éson aldedaincö ciamó "jogn", na eté che resservëia n gröm de ligrëzes y porchël él tan deplü na spordüda sce zacai mëss s’un jí bele tan adora da chësc monn. Insciö ésera stada pro Klaus Winkler d’Antermëia, che é gnü a mancé tla nöt dla sabeda ala domënia. La noela s’á slarié fora debota, ajache Winkler ê porsona conesciüda. Chësc nia ma por süa ativité tl ciamp politich. Pro chësta toca so contribut al intern dla SVP, olache al é sté dal 2009 cina al 2014 surastant dla SVP Val Badia, alüsc zënzater ince na usc critica y ficiosa. La SVP Ladina á bele inier orü le recordé publicamënter te n comunicat: "Por via de so gran impëgn y so laur politich a plü liví al intern dl partí le tignarunse tla recordanza cun reconescënza", scrí l’assessur Daniel Alfreider, "Nosc pinsier te chësc ri momënt dla vita i vá dantadöt a süa familia."
Klaus n’é sambëgn nia ma sté impegné tla politica. Personalmënter ái imparé da le conësce sciöche colegh canche i laurâ pro la cassa – olache al laurâ tl ofize informatich. Te chësc ciamp él spo ince jü inant dedô, olache al á lauré pro la dita de Pasquale Verginer, pro la Südtiroler Informatik AG, n pez pro le HGV y ciamó te d’atres dites dlâfora. I ultims agn s’âl metü por so cunt y fajô de chël vers consulënza informatica por imprejes. Y informatica insegnâl ince tl ITE da La Ila. Tla vita dl pice paisc sot Pütia s’ál ince porté ite, olache al é sté plü agn presidënt dl Consorz Antermëia y ê dötaorela atif pro i stödafüch, sciöche ince apascioné tla ciacia. Che Winkler pois palsé tla pesc de Dî.  (pablo)