La Usc di Ladins

En sabeda ai 22 de messé 2023 á n ël de 50 agn messü lascé la vita te na desgrazia sö por munt, plü avisa tl sit tlamé dala jënt "Ander dla nëi" ai pîsc dl parëi dla Piza dales Diesc. Ara se trata de Cristian Marchionni, n friser dër conesciü a Avezzano (prov. de Aquila/Abruzo). Aladô dles informaziuns dl pröm aiüt ê Cristian söl iade de na escursciun adöm cun n so compagn, canche al é slizié fora söl banch dl parëi sura l’amudlamënt dla nëi y é sbriscé y tomé jö por chi 6 metri cina jödapé dl parëi olache al é resté zënza se möie.
Söl post él rové defata na scuadra dl’Aiüt Alpin da La Val, la Verda de Finanza y l’elicoter dl Aiut Alpin Dolomites. Por l’ël amant dles munts n’él plü sté nia da nen fá. Te süa cité da Avezzano s’á la notizia atira spanü fora te spavënt y plüra.