Val Badia: ”Na nöt da infern!”

Data

30 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La Val Badia atocada dal rî tëmp: 60 porsones evacuades a Corvara, la Gran Ega sö pro a Pedraces, n mort a Lungiarü y lëgns rosedá tan co indlunch. Insciö éra jüda te nüsc paisc y n comandant de stödafüch dla Val Badia la definësc ”Na nöt da infern!”
Sciöche al é sté te tröpes regiuns dla Talia, é ince la provinzia de Balsan gnüda atocada tl fin dl’edema passé da na gran ona de rî tëmp. La Provinzia baia de n evënt centenar, da chël che gnanca la Val Badia n’é gnüda sconada. Do che al ê gnü de gran plöies, él gnü gran vënt, che á rosedé n gröm de lëgns, fat salté la forza eletrica y desturbé linies dl telefon. La piza dl alarm é stada le lönesc ai 29 d’otober da sëra cina al de do da doman, olache düc i grups de stödafüch dla Val Badia é gnüs cherdá y baldi á le stödafüch Giovanni Costa da Lungiarü messü perde la vita. La Val Badia é ince stada n pez isolada, do che la Gadera â arjunt liví fora de mosöra y é jüda porsura a Flaurënz, y che al é gnü stlüt düc i jus - adinfora de Arparora. Cun i comandanc di stödafüch che i un sciafié da contaté, unse porvé da fá n bilanz de sciöche ara é stada.

CORVARA: 60 EVACUÁ
A Corvara ára metü man incër les 17 cun na roa che s’á destaché sö cuntra Ciaulunch - nes cunta le comandant di stödafüch Helmut Thaler. Plü zitia éra indere gnüda tl raiun de Sciüz, olache al s’á destaché sön la tëmpla na smöia chi 70 metri leria y por fortüna nia cis sota. Cun le scür y la plöia che tomâ inant, án tut la dezijiun da evacué döt le raiun incër le Panorama, y 60 porsones é gnüdes condütes te salf dles manifestaziuns y á messü dormí altró. Le mertesc da doman áres podü zoruch tles ciases. Inant éra jüda cun pumpé fora ega - danter l’ater tla cianoa dl alberch Fontana dl Ombolt, olache al ê 1,5 m d’ega. Ince a Calfosch án albü da pumpé fora plü cianoes implides d’ega y dedô él sté da jí a daidé i compagns da Corvara - nes dij le comandant Jouk Oberbacher. Lapró ân n edl sön la roa de crëp de Sela, olache al gnô jö de piceres smöies.

GRAN EGA SLUNFADA
Gran trica él sté tl paisc de Badia, olache la Gran Ega s’â slunfé sö prigorosamënter, tan da rové a Pedraces ala pér cun la strada. Insciö án messü evacué le lönesc de nöt le Badia Pub - evacuaziun destuta le de do da doman. Lapró se temôn che al jiss ia les condütes dal gas, ci che n’é por fortüna nia sozedü. Da sćiampí án albü cun le gran vënt, che á rosedé de gran lëgns cuntra Pescol.
A La Ila á le vënt rosedé danter 5 y 10 hectars de bosch - lion da n comunicat dl Comité Operatif Comunal - deperpo che le raiun dla roa d’Altin s’á slarié cotan, cun lëgns tomá y material gnü jö. De nöt án messü tó y jí i ciavadus, deache an se temô che la Gran Ega podess jí porsura y s’ai tó para. 
Dorata manco zitia éra stada a San Ciascian, cun post plü zîte tla localité Gran Ancëi, olache an á messü lauré por che le rü de Störes y Arparora ne jiss nia porsura. Na picia smöia sö cuntra Piz Sorega án tigní cun suzes sot a control. Maiú trica án albü canche al ê gnü la comunicaziun che al vardô na stala - ci che n’ê por fortüna nia insciö. Le comandant di stödafüc. Daniel Alton nes á dit che söl lüch êl defora n container olache al vëgn lascé jö i cëindri de n implant da ziples. Le vënt i á soflé tl aier y ci che parô davëi de gran flames ê ala fin tizes.

EGA TE RAIUN ARTEJANAL
Trica por l’ega án albü tl raiun artejanal da Pidrô - nes cunta le comandant di Stödafüch da La Val Karl Nagler. Defata do les 6 da sëra án messü jí a deloje les eghes dl Rü d’Arciara che jô porsura y gnô do strada fora, tan che l’ega ê bele rovada ti pröms frabicac dl raiun artejanal. Zënza án albü ince chiló gran dafá cun le vënt, suradöt por lëgns tomá tles viles delá dal’ega, Ciampëi, Costa. I stödafüch á albü da laur cina da doman.

TËC SCARZÁ DAL VËNT
Tl comun da San Martin él suradöt sté la mort dl stödafüch Giovanni Costa a Lungiarü che á ascuré la situaziun. A Lungiarü á le vënt rosedé n gröm de lëgns y ince fat joré incërch de vigni sort. Lapró ên alarmá por material che gnô jö tles vijinanzes dla pizzeria Fornata. A Antermëia á le vënt ince scarzé demez tëc - nes cunta le comandant Ulrich Rubatscher, che baia de danns te vigni vila, cun lëgns tomá sön les strades d’azes - ma le zënter de paisc é gnü sconé. Tla vila da Planac él gnü scarzé demez n tët y lëgns é tomá sö por ciasa y tla vila de Colac éson intervegnüs cun i stödafüch da Rina deache le vëgn â destut na pert dl tët de majun y ciasa vedla. Ince sön la strada de Börz cunta Rubatscher de 50-60 lëgns rosedá. 
Tl paisc da San Martin él por le gran vënt tomé n gröm de lëgns suradöt tla localité Alfur cuntra Plaies, defora da Picolin, y é arsis tla strada dla Val Badia, ch’an á messü stlü. Lapró éson jüs a daidé i compagns da Lungiarü. Le comandant Alex Zingerle baia de na situaziun de gran trica pro ”sü omi” che ê tl intervënt. Danter Picolin y Longega á la Gran Ega slavaté terac pormez ala strada, che an á messü assiguré te un n toch.

PODRUN SÖ POR CIAMENA
Sö Rina á i Stödafüch albü da fá impröma tla vila de Colac, cun chi d’Antermëia y spo s’á le vënt ince tut n tët de na majun tla vila de Börz. Le comandant Florino Ferdigg dij che ”te plü posć á le vënt trat sö plates da tët”, y lapró rosedé n gröm de lëgns sön strada. Le medemo por le paisc da La Pli, che é sté isolé dal rest dla valada, deache dötes les strades ê stlütes da lëgns tomá te strada. I stödafüch á albü gran laur da romené demez lëgns dantadöt söles strades laterales tles viles da Pliscia y söla provinziala La Pli - Curt. Deplü ince les roes che ai á albü da romené fora.
Lëgns ia por tera ince a Al Plan, olache n valgügn de chisc é arsis sön i tëc de val’ ciasa, por fortüna zënza fá de maius danns. I Stödafüch y dites spezialisades á albü gran dafá da romené sö y delibré les strades. Na spordüda án albü tl alberch Majarëi, olache n gran podrun é raité dala tëmpla de Torpëi jö y é splundré te n mür de na ciamena. Ite por la Val de Mareo é les eghes jüdes porsura y s’á tut le punt che é al’altëza dla vedla ciavara. N fat corius é ince gnü a s’l dé te magazin di stödafüch, olache an ti á dé alberch por val’ ores a na ëra che mëssâ sté de pert. Pormó de nöt éra garatada da la condü te ospedal.  (pablo)