Tl bosch blanch

Data

15 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
A Bornech él da odëi na mostra personala de Ursula Tavella tl contest dl proiet espositif "Variatio"
I protagonisć de chësta mostra de Ursula Tavella vëgn fora de bosch y dala fantasia incër le bosch: al é la olp y le corf. Tröpes é les stories dla olp y dl corf, gonot decorades cun carateristiches umanes. La porsona n’á mai assá stories, y canche chëstes plej ciamó, divertësc y insëgna val’, él tl’aria n dialogh che ne stüfa mai jö.

I dessëgns de Ursula Tavella, realisá cun raisplais y püch corú, rapresentëia caricatures da forma y movimënt che lascia nasce mic te na atmosfera da liënda o fiaba. Por la mostra a Bornech tl "Raum3000" al intern dla esposiziun Variatio (Oberstadt) á Ursula Tavella ajunté n test dl scritur Lukas Bertagnolli, intitolé por todësch "Tl bosch blanch", en referimënt al scenar y funz blanch, sön chi che les figöres y vites dla artista se armör. Al dá imënt zacó da vire na storia che an conësc da invalgó tla infanzia. La olp y le corf é susc te bosch - cina che ai s’intënn un dl’atra... ai é n gröm, mo dan ai edli dla porsona tres ma "la olp" o "le corf". Ci foss pa le bosch zënza la olp y le corf, ci foss pa la olp y le corf zënza le bosch? Y ci foss pa ala fin la porsona zënza les liëndes y les cunties? Ursula Tavella nes proponn na animaziun sön papier che é deplü co "ma" chedri y ilustraziuns; avisa te chësta süa desfida stá la liberté y ledëza dl möt te ëra, tl möt te nos.

La mostra pó gní odüda cina en vëia de Santaguania.

Deplü tla Usc stampada atuala!  (Iaco Rigo)