Al’archirida dla "patria"

Data

09 de jené 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Escriziun dla cuarta ediziun de SMACH, concurs internazional de idees por sic de interes, dedicada al tema "Heimat". Terminn por tó pert: 17 de merz 2019
Le 2019 é indô n ann de SMACH, che stá por San Martin Art Culture History. Al é n proiet che mët fora laurs d’ert, istalaziuns y intervenziuns artistiches de artisć y grups de artisć, te diesc raiuns, abitaziuns y posć de interes storich-cultural söl teritore di comuns de San Martin de Tor y Mareo. Les istalaziuns dess descedé l’interes dla jënt por l’ert instëssa sciöche sentimënt y trasmisciun de contignüs, mo ince sciöche poscibilité de atraziun y promoziun de na confrontaziun leria y sota sön le tëmp passé y presënt, sön la storia, la tradiziun, l’architetöra y ince la natöra dal post. I posć scric fora por l’ediziun nöia é chisc: Strada de la Vena, Ciastel de Tor, Val dl’Ert, Forcela de Furcia, Pares, Chi Jus, Pra de Pütia, Fanes, Senes y Plan de Corones.

Le tema dla ediziun nöia é "Heimat", che é n conzet che ne vá - desche i organisadus scri - nia da traslaté ti atri lingac sciöche tl inglesc, talian y ladin, y inant: "Heimat" ne individuëia nia ma n post, mo na morona de valurs spontanns y coletifs che porta zoruch ala dimenjiun dl’infanzia, fajon nasce la sensaziun positiva che i sintiun canche i ponsun a nostes raisc, a nosta identité o al inzescü, fajon nasce la sensaziun de surité y impotënza che i sintiun canche le liam cun chësta dimenjiun é jü a perde.

Por le de 17 de merz 2019 menará ite interessá da döt le monn söes propostes al’organisaziun. SMACH é deventada intratan na uniun culturala y á ciafé l’ann passé ince na söa lerch de esposiziun, na galaria tla natöra, a San Martin de Tor, tlamada "Val dl’Ert". La juria che valutará y chiriará fora i laurs é metüda adöm da: Gehard Demetz - artist, Gianluca D’Incà Levis - Ideadú y Diretur artistich de "Dolomiti Contemporanee", Guus van den Hout - former curator at the MET New York, Julia Bornefeld - artista, Michael Petry - diretur MOCA, Museum Ert Contemporanea Londra. 

La juria cernará i laurs y i 10 sic por mëte fora les operes. I diesc laurs y intervënc d’ert gnará premiá cun n pest de 2.000,00 Euro porom (n iade aratades demez les cutes y retignüdes). I artisć fistidiará instësc te söa autonomia di materiai, dl trasport y da mëte sö so laur. I artisć é obliá da condüje demez sü laurs a fin dla mostra SMACH (cina ai 15 de setëmber 2019), y chësc sön süa iniziativa y spëisa.

Le proiet sará da odëi dai 6 de messé 2019 (canche al sará la vernissaja) ai 8 de setëmber 2019. Dötes les informaziuns ütles y pratiches ciafa i interessá te internet (www.smach.it).  (Iaco Rigo)