N gran spetacul musical por scialdé les aries

Data

10 de jené 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
“Herbert Pixner & Italo Connection” gnará en domënia sëra a Al Plan, ala pert él ince i dui musizisć Max Castlunger y Alex Trebo da San Martin de Tor. I s’l’ún cuntada cun Max Castlunger de chësc proiet südtirolesc che arjunj tres plü simpatia y interes te nüsc raiuns y ti Paisc Todësc. Max Castlunger instës á deplü soms, tl ce y tl cör
De forá piará ia n tour de bëgn dodesc conzerc ti Paisc Todësc. I protagonisć sará i componënc dl grup “Herbert Pixner & Italo Connection”, na formaziun cheriada da püch cun le fin da fá musiga. Ci che é dit tan scëmpl - "fá musiga" - é na incuntada de musizisć da na bona formaziun y profescionalité, che ó se moscedé adöm ti stii desvalis, zënza genre limité, crësce adöm te amizizia y compagnia. N bus menará la band da n post al ater, da na paladina al’atra. Na cercia de ci che Herbert Pixner y söa "Italo Connection" á de musiga y energia sará da aldí en domënia a Al Plan, en gaujiun dl "opening" por la gara de Copa dl Monn dles ëres en program en mertesc söla Ërta.

Max Castlunger y Alex Trebo ti dá stöp pro la "Italo Connection" metüda sö dal gran Herbert Pixner. Ai é compagns da pici insö, á fat les prömes scores deboriada, s’á spo do les scores altes despartides indô incunté a Bologna al’université. Ai se conësc da agn tla vita y tla musiga, ai á soné deboriada gonot pro la Spolpo Blues Band y cun le proiet original “PLAY”, ince adöm a Manuel Randi che n’é nia da plü da ponsé demez da Herbert Pixner y fej ince pert dla "Italo Connection". Max Castlunger cunta de söa amizizia cun Alex Trebo insciö: "I pó bëgn dí che i les á combinades n pü’ dötes cun Alex, y sëgn che ël é a Berlin le vëighi demanco, mo la amizizia ne müda nia... Musicalmënter ái ince albü l’ocajiun plü gonot da colaboré cun le grup de new jazz "MOP MOP", le grup olache Alex é un di fondadus." L’ann passé de jügn s’á i dui compagns n iade incunté por n apuntamënt extramusical, dala noza de Max: Alex é gnü adalerch por fá testemone. La musiga á intënt la festa.

La Usc: Max Castlunger, te confórteste a osc conzert a Al Plan?
Max Castlunger: "I sun der contënt da podëi soné tla Val Badia, a Al Plan de Mareo, le paisc de mia mama, adöm a mi gran compagn Alex Trebo da San Martin, cun chësc proiet musical nü de Herbert Pixner & The Italo Connection."

Deplü tla ediziun de La Usc di Ladins endoman!