Debut a Al Plan de "Nia ma tango"

Data

13 de jené 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Le titul dl cd nü é "Non solo tango", al é gnü fora a livel mondial. Les döes interpretes é Angela Palfrader y Raffaella Zagni. I odun ti detais de ci che ara se trata. Conzert de presentaziun indoman, lönesc sëra
Val’ iade án l’impresciun che an s’injömes val’ te nostes valades ladines, che an sides dalunc dl gran monn. Mo ince valades liëia y pó ester poscibilité de incuntada danter porsones che á tröp da se dí. Insciö éra jüda cun Angela Palfrader, vidorista d’La Pli de Mareo, y Raffaella Zagni, pianista da Bologna, che imparé da se conësce - i podesson dí por cajo - a Al Plan de Mareo. Raffaella, da ciasa infora bele da trëi generaziuns musizista y amanta dla munt y dai schi, conësc Al Plan desco secundo daciasa. Entusiasta dla vidora - so nene ê vidorist - ára cun gran ligrëza tut l’ocajiun da fá duo cun Angela. Angela Palfrader instëssa é ti ultimi agn jüda fora por l’Europa cun söa vidora y é rovada cina tl Brasil tl teater São Pedro, na istituziun importanta a São Paulo. Deboriada á Angela y Raffaella cherié n cd particolar de musiga tango y ti á dé l’inom "Non solo tango". Al é na musiga che dess ti jí a cör a ingröm, nia ma ai amanc dla classica. En lönesc ai 14 de jená 2019 dales 20:30 tl Salf dla Scora de Musiga a Al Plan saral la presentaziun cun conzert dal vi.

La Usc: Angela Palfrader y Raffaella Zagni, por bambona n CD nü?

Angela Palfrader: "An dij 'ann nü, cd nü', no pa? (s’la rî). Al é na gran ligrëza por me da podëi mëte man l’ann nü cun avëi bele le cd fat tla man. En chësc iade n proiet döt nü, musiga tango, dles melodies plü famojes dla storia."

Raffaella: "L’amur é le fi y la stiza che á fat nasce 'Non solo tango'. An pó dí che chësc cd é nasciü por amur, amur de n pere che scrî por la fía, y amur de na fía che rengraziëia y onorëia le pere, cun  soné y registré söa musiga. Le tango instës é na ert che liëia cultures y baia d’amur."

"Non solo tango" é na racoiüda de toc musicai conesciüs lunc y lerch; Raffaella da olá vëgn pa l’idea por chësc repertore?

Raffaella Zagni: "'Non solo tango' n’é nia na racoiüda classica, mo n album de de beliscimes parafrases da conzert sön i tanghi plü conesciüs dla storia, scric da Bruno Zagni, compositur y diretur d’orchestra cun cariera internazionala söles sciables. L’idea é nasciüda dan da val’ agn, ponsan ala tradiziun dl otcënt da soné ti salfs dl’aristocrazia fantasies sön melodies conesciüdes de chël tëmp. En laota gnôl tut ca temesc fora dl’opera, aldedaincö él le tango argentin che afascinëia y la davagna. Piazzolla instës, cun so stil apascional, rich y universal á alzé le tango, desco musiga da bal, a musiga rafinada, fata por gní sonada ti gragn salfs da conzert. 'Non solo tango' pëia tanco ia dal popolar dl tango argentin y le svilupëia cun influsc jazz, valzer, rumba y d’atri stii. N spetacul artistich por na picia formaziun desco la vidora y le clavier, olache an n’á nia l’impresciun che al mances val’."

Deplü tla ediziun de La Usc atuala!