Studënc da La Ila por le clima: ”Clima nes reverda düc!”

Data

21 de fauré 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ince chi 70-80 studënc dles scores altes da La Ila é jüs a Balsan ala desmostraziun por le clima. Ai nes á dit deplü sön sües motivaziuns.

Döt cant á metü man cun le coraje de na jona. I baiun de Greta Thunberg, svedeja de 16 agn, che á fat dla sconanza dl clima zacó na misciun por süa vita y á cun na aziun metü en pé le movimënt da ”sté demez adala scora por le clima”, che s’á slarié fora te plü naziuns dl’Europa. En vëndres ai 15 de forá é la protesta ince rovada te Südtirol, metüda da jí dala Consulta Provinziala di studënc. Le suzes é sté sura vigni aspetativa: danter 2 y 3.000 scolars y studënc s’á abiné a Balsan por marcé deboriada fora por cité y s’archité dan i palac provinziai, por damané che la sconanza dl clima vëgnes metüda plü alalt tles ajëndes politiches. 
Ala pert él ince danter 70 y 80 studënc dles scores altes da La Ila. L’aziun á descedé gran interes y á ringhiní te döta la provinzia.

Nos sun jüs a ti damané a valgügn studënc dles 5. classes da La Ila, ciodí y cun ci spirit che ai á tut pert. ”A ponsé che la tera se scialda sö tres deplü y che al é tan de emisciuns de CO2, me savôl important da protesté y desmostré”, dij p.ej. Alexia Berti de Badia; ”Sce nos ne metun nia man da fá val’ por le clima, le plü snel che ara vá, ne restarál nia plü tröp da aprijé”, injunta Matteo Agreiter da Corvara; ”Chël dl clima é dër n gran problem, che reverda düc nos” é la convinziun de Ylenia Leggio d’Al Plan.

T’La Usc di Ladins di 22 de forá ciafarëise deplü sön la desmostraziun a Balsan. I aldiarëis la minunga dla direturia dles scores altes da La Ila Elena Pellegrini, y les tutes de posiziun di studënc suradic.

 (pablo)