Tres indô zoruch a Assisi

Data

17 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Assisi é na storia d’amur. Al é na storia de n gran amur. Olache jënt chir ligrëza y le tru cun i stromënc por ciafé se instësc, Dî y le proscim
Al é na storia de liberté, de n jonn, Francësch, un di plü ric dla cité, che á orü ester püre por podëi deventé rich te n’atra manira. Al é la storia de na jona, Chiara, che tres Francesch s’inamorëia ince ëra dl Signur. Dui revoluzionars, döes porsones che ti vá do a so cör deplëgn, te na Assisi medievala, costruida sön fondamëntes romanes, che rapresentëia aldédaincö l’incuntada locala y teritoriala cun le gran monn internazional. Ric y püri, jënt de vigni religiun, y ince chi che ne crëi nia, vëgn a Assisi a ciafé Francësch. A se lascé ispiré, desche pelegrins y turisć de belëza.
La jënt dl post é dër liada a san Francësch, al é jënt scëmpla y da orëi bun, che á por le sant gran respet y veneraziun.
Iö á albü le plajëi da podëi vire te chësta cité por cin’ agn y tres indô vái ion zoruch a ciafé Francësch cun ligrëza canche i á n pü’ dlaurela.
Le “Poverello” d’Assisi é n gran maester de vita y de spiritualité. Tl pordonn y tla ligrëza á ciafé so sté al monn na gran lerch y dimensciun. Al orô porté vigni porsona ala salvëza, a paraisc. So amur por la natöra, por la creaziun ê gran. Te vigni porsona odôl ël n fre y na so.
Tla gran basilica, olache san Francësch é sopelí, pón odëi n ziclus gigantesch de depënc de Giotto, y al é dër bel y de morvëia da passé tëmp dailó y lascé pro che l’anima s’intënjes ti bi corusc. 
I mürs lominusc de pera dla cité d’Assisi é vis y cunta ciamó aldedaincö de chësc amur che á vit dailó. Tres ciamó sínton le bun cialt y la forza dla vita che ressorësc tres indô danü.
Y la natöra incër la cité dla pesc, söi coi y jö tla planöra é beliscima. Y mai ne se stüfon da ti ciaré.

Christian Ferdigg