N punt che liëia natöra y viandanc

Data

20 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Le conzet y plann de n punt nü söl Tru di Artisć é dan man. Le designer Harry Thaler l’á presenté al grup de laur.
Le Tru di Artisć söl tru vedl danter La Ila y San Ciascian podess en chësc isté gní arichí cun na opera nöia: n punt nü che passa ia la Gran Ega sot la vila de Costadedoi. Dessegné é le punt gnü dal designer conesciü a liver internazional Harry Thaler, che é ruvé personalmënter a La Ila por splighé al grup de laur so plann y proiet. Harry Thaler vir a Maran. Chiló ál ince so stüde, dlungia a London. Dal 2016 incá insëgnel ala Facolté de design y ert dla Université Lëdia de Balsan. Ala pert por la realisaziun dl punt é le Comun de Badia y l’Assoziaziun Turistica de Badia. Le proiet podess ciamó incunté val’ mudaziun y adatamënt, por desgropé cuestiuns de proprieté privata. Mo l’idea de Harry Thaler podess romagne tla sostanza.

"Le proiet ne se basëia nia ma söla funzionalité da passé sura rü ia", dij Thaler. A chësta manira ál orü dessegné n punt de na architetöra nia tradizionala, mo bizara - sciöche al dij. I dui parëis dl punt a forma de ones che se incruj amez rü dess se inserí bun y bel tla contrada y ester n liamënt de natöra y design. "Al é sciöche la strotöra cherscess fora de tera y se adatëia organicamënter y armonicamënter cun le profil dl terac", insciö Thaler. La tenjiun che tira indere l’edl vëgn cheriada söles spones dl rü, olache al pëia ia les lignes geometriches ti parëis dl punt. La dessonanza arjunj la colma amez le punt, olache les döes ones s’incruj. L’assimetria ti surandá al punt na dinamica significativa, al é sciöche n abrac de porsones.

I parëis dl punt gniss realisá cun pa de lëgn arcunciá un dlungia l’ater, te val’ passaje toch adöm y spo indô a destanzes avisa, por manifesté trasparënza y lisierëza. Le punt liëia adöm - aladô de so dessegnadú Harry Thaler - stabilité, natöra y design, scemplité y significat.  (Iaco Rigo)