Suzes: 502 laurs dá jö por SMACH 2019

Data

20 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Le proiet artistich SMACH tres plü conesciü: por la ediziun da iniann, dedicada al tema ”Heimat”, él rové ite 502 laûrs artistics
Iniann d’isté rovará le proiet artistich SMACH a süa cuarta ediziun. Ara se trata dla mostra bienela nasciüda l’ann 2012, che se tol dant da lié valorisé y lié l’ert y la natöra. La ediziun da iniann i é gnüda dedicada al tema ”Heimat”, na parora che ne se lascia te tröc lingac nia traslaté. I promoturs dl concurs scrí che ”Heimat á na forza identificativa cotan plü grana. „Heimat“ ne individuëia nia ma n post, mo na seria de valurs spontans y coletifs che porta zoruch ala dimenjiun dl’infanzia, fajon nasce la sensaziun positiva che i sintiun canche i ponsun a nostes raisc, a nosta identité o al contrar, fajon nasce la sensaziun de surité y impotënza che i sintiun canche le liam cun chësta dimenjiun é jü a perde”.
Le tema mëss avëi descedé emoziuns y sentimënc, y bele sëgn pón dí che la ediziun 2019 á arjunt n gran suzes, deache al é rové ite bëgn 502 propostes de laurs artistics, tanco feter cater iadi tantes co pla ultima ediziun. Interes él sté veramënter da vigni piz dl monn: nia ma artisć da gran pert di stac europeics, mo ince dal Südamerica ai USA cina al Canada, dal Armenia cina ala Corea dl Süd, dala Ruscia cina tl Iapan y tla Cina. Al sará porchël bindebó de laur por la juria, da chirí fora les 10 operes che podará spo efetivamënter gní realisades. Chëstes gnará comunicades söl sît smach.it ai 12 d’aurí. Les operes sará spo da odëi döt isté, metüdes sö te postaziuns de interes natural, storich y cultural di comuns da San Martin y de Mareo: 1) Plaies y Alfur; 2) Ciastel de Tor; 3) Val dl’Ert; 4) Chi Jus; 5) Pra de Pütia; 6) Forcela de Fucia; 7) Pares; 8) Plan de Corones; 9) Fanes; 10) Senes.
SMACH é cun le passé dl tëmp tres chersciü: dl 2015 êl rové ite 86 laurs, dl 2017 n’êl 142 y iniann bëgn 502.  (pablo)