"Mies prömes parores" sëgn ince online

Data

15 de auril 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Presentaziun dl e-book dodoman mercui, ai 17 d’aurí 2019, tl Istitut Ladin a San Martin de Tor
Do 6 agn dala pröma ediziun de "Mies prömes parores" á l’Uniun Ladins Val Badia y l’Istitut Ladin Micurá de Rü na gran ligrëza da presenté sëgn ince l’e-book. 
Por mirit dl format digital dla publicaziun pón sëgn ti ciaré a "Mies prömes parores" da n computer, da n tablet o da n fonin, da indlunch olache i ëis na conesciun a internet. Insciö ëise "Mies prömes parores" tres pro os. 
La publicaziun conesciüda por i dessëgns dër garatá y plajors de Gabi Mutschlechner y por les plü co 1.000 parores te 4 lingac che tol ite incër 50 argomënc d’interes por pici y gragn de Sara Moling, é gnüda dada fora ti 5 idioms ladins dles Dolomites, por furlan y por mochen.
Sëgn á le liber ince n fre digital: dötes les ediziuns é ince da ciafé sciöche e-book.
Na gran novité dla publicaziun digitala nöia é che ara vá da ascuté les parores. Chësc é dessigü dër d’aiüt por les parores inglejes; mo ince por ladin ne sán datrai nia avisa olache l’azënt toma: dijon mo acrobát o acróbat? Mo chësc n’é nia döt. Cun l’e-book pón ince fá jüc cun les parores y i dessëgns. Y le jüch é dessigü la manira plü da plajëi y datrai ince plü da faziun por imparé lingac foresć. Da incö inant podëise jí debann söla plata internet www.parores.it y descurí les poscibilités nöies che l’e-book pita.
Le liber é, por chi che ne l’á nia ciamó, sambëgn tres inant da ciafé tl Istitut Ladin a San Martin o tla botëga online www.micura.it
L’e-book "Mies Prömes parores", nasciü dala colaboraziun danter Istitut Ladin y Uniun Ladins Val Badia, vëgn presenté en mercui ai 17 d’aurí dales 17:00 tla sënta dl Istitut Ladin a San Martin de Tor.
Daimproia gnarál spo ince presenté la verjiun fodoma, ampezana, gherdëna y fasciana: ai 4 de ma dales 10:00 a La Plié de Fodom (Mie prume parole / Ra mè prima paroles); ai 14 de ma dales 16:30 tla sënta dl Istitut Ladin te Sëlva (Mi prima paroles); ai 17 de ma dales 19:00 a Sèn Jan tl Museo Ladin de Fascia (Mi pruma paroles).
Düc é dër bel inviá!