"Tan bela che la vita é!"

Data

25 de auril 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Getúlio Felipe de catodesc agn, atoché da paralisa zerebrala, á arpizé la Marmolada, le crëp plü alt dles Dolomites
La domënia de Pasca dl 2019 ne se desmentiará le brasilian Getúlio Felipe nia tan atira, deache en chësc de s’ál realisé un de sü gragn soms da arpizé la Marmolada. Al é sté bun da ruvé cina sön Punta Penia a 3.343 metri sura le livel dal mer, tres sö por le tru normal. Getúlio, acompagné dal mënacrëp Alessio Nardellotto y dal compagn Pedro McCardell che â fistidié dla spediziun, é pié ia en chert do les sis da doman da Pian Dei Fiacconi por arjunje la piza te nü ores de nëi, frëit, vënt y fadia. Ala spediziun á ince tut pert l’alpinist Alberto Benchimol de Sportfund che á assistí le team, y le fotograf Stefano Fabris, che á documenté l'arpizada por la realisaziun dl film "Driven", testemonian a chësta manira la gran forza fisica y mentala por desfidé les condiziuns atmosferiches ries da dí danfora, l’altëza y le tru normal dla Marmolada, y ti desmostran ales porsones che la forza dla orenté pormët da realisé i soms che an á.

La pröma ora d’arpizada é jüda dër bun ince por mirit dles condiziuns dla nëi ciamó dlaciada, mo spo jon inant á la spediziun abiné na nëi tres plü morjela y sfadiosa. Te chëstes zircostanzes á le grup incër Getúlio dit plü iadi che al foss miú da dé ota, mo le jonn n’orô nia la dé sö, y s’á trat inant cun convinziun y forza cina söla piza. Ruvé söinsom dan ales morvëies dl panorama á Getúlio comenté insciö so capolaur: "Tan bela che la vita é!"

L’aventöra de Getúlio dess ester na ispiraziun por düc chi che á soms y arata da ne podëi nia i realisé. Döt vá da fá! Da möt ti êl gnü dit che al ess messü passé döta süa vita te n scagn da rodes, mo canche al â set agn metôl man da jí su y da iló incá tignîl pro da somié da orëi arpizé n crëp. L’idea de chësta spediziun é gnüda da Pedro McCardell, fondadú dla sozieté americana Lyfx, che ti l’á spo proponüda a Getúlio tl 2015 - do avëi avëi odü la forza mentala nia da crëie dl jonn y so lian positif y atif dla vita. Ti ultimi cater agn á Getúlio donca alené le corp y la mënt por se arjigné ca al’arpizada, pian do ince le bëgnester da pert di doturs. Partners de chësc proiet tan umann é stá Climbing Technology y Montura, che á dé ca al team le vistimënt tecnich y döt le material, y l’Alta Badia. Le patrozinat é gnü dé dala Fondaziun Dolomites UNESCO y da Sportfund fondaziun por le sport Onlus.

Lyfx


Lyfx é na plataforma d’aventöra che consint ales porsones che chir esperiënzes entusiasmantes da se mëte en contat cun mënacrëp locai esperc. Lyfx á na organisaziun de produziun cinematografica, Lyfx Films, cun chëra che ara realisëia films d’aventöra independënc. Lyfx nasc dal’idea dl aventurier, regist y imprensar Pedro McCardell da ti daurí sö la Natöra y so teritore a düc.
 (Iaco Rigo)