La Usc di Ladins

Do n iter bon lonch e senester zacan, 5 meisc do la litazions, ence la Jonta regionèla é vertia a tachèr sie lurier. Do la litazion di assessores en mercol de la setemèna passèda, chest mercol se à binà la Jonta e l é stat dat fora la deleghes. L conseier ladin de la provinzia de Trent, Luca Guglielmi, descheche l era jà pervedù, l é donca l nef assessor a la mendranzes linguistiches.

Luca Guglielmi l à 34 egn e ai 22 de otober del 2023 l é stat lità conseier provinzièl con la lista de zenter dreta »Fassa« per la seconda outa, conferman l mandat de raprejentanza che la val ladina de la provinzia de Trent ge aea jà dat per la pruma outa d’uton del 2018.

Te chesta legislatura Guglielmi l é l soul ladin te la Jonta regionèla e l é a sia pruma encèria da assessor a livel regionèl e provinzièl. Te l’ultima legislatura defat l’encèria de assessor a la mendranzes era jita per duc i 5 egn Manfred Vallazza, e Guglielmi l era enveze vizepresident del Consei regionèl, encèria che te chest mandat é stata touta su dal assessor provinzièl Daniel Alfreider. Ge aon fat na intervista al scomenz de sie mandat.

De più su La Usc stampèda de en vender ai 22 de mèrz.


 (Lucia Gross)