La Usc di Ladins

Soreie e piaz pien de jent en mèrtesc, festa de Sènta Maria Maor, a Ciampedel per chela che tradizionalmenter vegn chiamèda ‘Festa di Omegn da mont’, ma che anchecondì fossa miec ge dir ‘Festa de la Jent da mont’, ajache semper de più l é la femenes che va sa mont e che sui crepes les porta socors e les vida la persones en segureza. Desche la Madona – à dit don Mario Bravin te la messa – che ne moscia l zil e la ne disc olà meter i piesc canche l troi é adort e senester e stenton a jir inant.  

Na messa bela, tel piaz cercenà dai colores de guanc e bandieres di gropes de folclor, viventèda da la cianties del cor e olache, enceben la gran prejenza de foresć, no l é mencià la orazions a Sènta Maria per ladin.

I volontadives de duta la sociazions che met adum l prezious mond del socors, de la protezion zivila, de la solidarietà e del empegn sa mont é stac protagonisć de la prozescion ofertorièla, olache trei bezes à portà sun utèr dedant a la statua de la Madona ence la manes de tradizion.

Dapò con la Musega Auta Fascia che à compagnà i momenc mesties e ofizièi e chi più algegres de la festa, duc se à tramudà lo da la statua de la Guides, olache i menacrepes à pojà la corona de orèr e la paroles de Stefano Lazzer, Ivo Bernard e Luigi Felicetti à recordà l segnificat de chesta festa, mingol de storia del alpinism e ge à dedicà n pensier pien de emozion a la vitimes che à perdù la vita sa mont, recordan per duc Alex, Diego, Erwin e Luca, morc per didèr i etres. 

De più su La Usc stampèda de vender ai 18 de aost.  (Lucia Gross)