La Usc di Ladins

L Belarus o Bieloruscia, plu da giut ence clameda Ruscia Blancia, é n stat europeich dl est che termeneia con la Ruscia, la Ucraina, la Lituania, la Letonia y la Polonia. L stat compeida chi nuef milions de abitanc, l 80 % é belarusc ma al viv ilò ence cotant de rusc y ucrains; l 80 % é de religion ortodossa, en plu él zacotant de catolic, protestanc, ebrei y musulmans.
L Belarus fajova na outa pert dla Lituania spo dla Polonia; a la fin dl 1900 é l Belarus ruvé pro la Ruscia y dl 1920 él vegnù na republica sozialista sovietica. Dal 1991 encà é l Belarus per merit de Gorbaciov n stat independent, che vegn dal 1994 encà governé con man pesocia dal ultim ditatour comunist europeich Lukashenko, che vegn metù sot a prescion da Putin per che al l deide contra l’Ucraina.
Tl Belarus comana n regim comunist autoritar che ne dura nia oposizion; ben 1500 perjoniers politics él tl Belarus; les perjons é crudeles y les verdes brutales con i perjoniers; la parentela ne sà en gran pert nia sciche ala ti và ai siei te perjon y sce ai viv ciamò. Empò él cotant de ativisć che se met contra Lukashenko y risćia la perjon y finamai la mort.
Una de chestes é Olga Karatch, che à pié do ai 3 de merz a Bulsan l premie internazional "Alexander Langer 2023", che vegn dé fora da la Fondazion Alexander Langer.

Deplù podeise lieje t’La Usc di Ladins di 22 de merz  (Lois Trebo)