La Usc di Ladins

Ai 26 de fauré àn cherdà l joler per n ntervënt a Colfosch, ulache doi dai schi fova fric adum: un se ova fat mel ala sciabla y l segondo al piet. Tramedoi ie unii ciariei tl joler y menei tl spedel de Burnech.
Do marënda iel stat n nzidënt sun l purtoi de Dantercëpies: na turista svedeja se ova rot na giama. Do la prima cures iesen julei limpea tl spedel de Persenon.

Ai 28 de fauré ies stat doi ntervënc tla Ladinia, tramedoi pen nzidënc sun purtoies: l prim per n’ëila che se ova rot na sciabla sun Mont de Sëuc, l segondo sun Secëda, per n ël che fova frit ora de purtoi. Tramedoi àn menà tl spedel de Persenon.

Ai 29 de fauré à la zentrela de Bulsan cherdà l joler cueciun sun Piz Setëur, ulache n ël fova unì stlet a furné su cun la sentadoia y ova perdù cuscienza. Riesc iel unì reanimà da chëi dl sucors sun purtoi – cie che ie stata si gran fertuna. N à pudù l ciarië tl joler y julé limpea tl spedel de Bulsan.
Dala 13:42 àn cherdà l joler pra la utia Vallongia, ulache n ël finlan­desc se ova rot na sciabla tuman cun i schi. La duturëssa ti à dat zeche contra l mel y n ie pona julei limpea a Persenon te spedel.
Dala 15:19 ie n ël tumà sun la Saslonch, batan dassënn l cë. Sëuraprò òvel nce n gran mel al spinel. L Aiut Alpin Dolomites ie stat riesc sun luegia y do che n l à stabilisà l àn ciarià tl joler per l mené tl spedel de Persenon.
Dala 22:00 à la Crëusc Cuecena menà adalerch n ël che ne se n stajova nia bën tla sënta a Puntives. Cun suspet de TIA (atach ischemich che passa) l àn menà cun l joler tl spedel de Bulsan.