La Usc di Ladins

Gaia, peste te prejentèr?
Gé son del 1965 e vegne da Rapallo, te la Liguria. Son ruèda a Cianacei jà da picola en vacanza, ajache chiò mie genitores aea fat su la Villa Ninina. Chiò é cogno­sciù Paolo Bernard e son vegnuda a stèr del 1987, se aon maridà e aon trei fies, dut ic, che ades i fèsc l’università.

No te él mencià l mèr?
Ei, l mèr me mencèa, soraldut al scomenz. No l jir te spiagia, ma l’avertura che l mèr me dèsc, alincontra di monc che enveze i sera. Chest mingol l é padì, ence se chiò me troe ben e l é stat segur n bel ambient per fèr crescer mi fies, ma é semper chierì de ge dèr ence la cultura averta de la Liguria, del mèr, del vardèr e jir dalonc.

Che studies èsta fat?
É fat l liceo linguistich e do é studià desche infermiera pedia­trica al Gaslini de Genova. Can­che son ruèda te Fascia é vedù che mia fegura profescionèla no la era perveduda, ne te ospedèl fora Ciavaleis ne tel Comprenjorie, coscì é lurà per n trat te vèlch ambulatorie traumatologich privat e dapò é tacà a lurèr te la boteiga de sfoes e tabaches de la familia de mie om, che endèna l aea endò tacà a studièr al Conserva­torie jun Busan e l era de spes demez. (Intervista de Lucia Gross)