La Usc di Ladins

"Cun gran plajëi podunse, do trëi agn de tröp laur, crüzi, paziënza y burocrazia, benedí y mëte en sorvisc chësc tanch nü – n meso de aiüt por döt nosc comun y surafora." Cun chëstes parores á le comandant di Stödafüs d’Al Plan Christian Rindler metü man l’at ofizial pro l’inaudaziun dl meso nü, che é garatada en domënia 5 de ma. Zënzater la dërta domënia, gnôl pö ince festejé le patrun di stödafüch San Florian, che vëgn recordé te nüsc paisc cun zelebraziuns sintides. Insciö ince a Al Plan y La Pli, che festejëia bele da tröc agn deboriada, cun na santa mëssa alaleria tla vila da Curt, olache la picia dlijia é dedicada ince a chësc sant.
An n’á nia gonot odü tan de jënt. Da intrami i paisc s’á metü sön tru bele da doman les prozesciuns dles comunités acompagnades da sü stödafüch, y chëstes s’á spo incunté dan la vila, por jí sö deboriada y fá la prozesciun cun vangele incër la taela. Dedô á le ploan siur Klaus Sottsas zelebré la mëssa alaleria, abelida en chësc ann dala Musiga d’Al Plan.
Sciöche dit, él por i Stödafüs d’Al Plan sté na festa tla festa. Canche la prozesciun rovâ zoruch te paisc, êl bele sön plaza le meso nü, inforní cun ciüfs y gherlandes. Y da plaza demez s’an metü sön tru devers le magazin, cun iadô le gran protagonist dl de – le tanch nü: n meso che tol ite le post dl vedl Mercedes Benz 1124 TLF A-2000, che á oramai 31 agn sön les rodes.

Deplü sön la festa de benedisciun, sön le tanch nü y sües carateristiches, sön la tota dl meso nü y sön ci che al podess sozede cun le tanch vedl, podëise lí t’La Usc di Ladins di 17 de ma  (pablo)