La Usc di Ladins

La miú noela dles partides dla ultima fin dl’edema vëgn por la scuadra dl ASC Mareo de pröma categoria. I ladins á arjunt na devënta te ciasa cuntra le Rasun/Antholz, por 2 a 1, che ti dá na gran sbürla por la salvëza tla categoria. I maroi é sëgn al 10. post (sön 14 scuadres) cun 24 punc.
Daldöt nia buté ne i ára ales scuadres dla valada che soga tla terza categoria. Le ASC Mareo B á messü dlotí na pordüda tlera de 4 a 1 cuntra i secundi dl Uttenheim, la scuadra dl ACD Val Badia á incassé fora de ciasa n 3 a 1 cuntra le Perca y la scuadra dla US La Val n’é cuntra i ultims dl Prettau nia stada buna da jí sura le per fora: 1 a 1.

Les croniches plü menüdes de dötes cater les partides ciafëise sciöche dagnora t’La Usc stampada.