La Usc di Ladins

Enrico Tommasini met te sie album n’autra edizion garatèda del Dolomiti Ski Jazz. L é oramai la numer 26, e pian pian l ambient musical che porta dant la sonoritèdes del jazz, te sia desvaliva esprescions più tradizionèles, più sperimentèles, o più lijieres e populères, ciapa semper de più aprijiament ence te Fascia. 

N muie l é i ghesć pascioné de chesta formes musicales che tel dezider la setemèna da passèr sui schi te noscia val i vèrda apontin de la fèr conjobièr con chest event. L lo à entenù e fat entener ence Paolo Grigolli, che l é do a serèr su sia encèria a la vida de l’APT de Fascia per ge zeder definitivamenter l testamonech a Nicolò Weiss, e che en sabeda ai 16 de mèrz da la paladina del Navalge l à podù veder l teater pien e rès de jent per l conzert de John Scofield: l chitarist de nonzech mondièl, ensema con Jon Cowherd al piano, Vicente Archer al contrabas e Josh Dion a la bateria, l à  portà dant l program »Yankee Go Home« che l é stat dassen aprijià dal publich. Se spera che ence chi che vegn do da el i seghite a creser te chesta proponeta de gran valuta, tant a livel musical che turistich.

»No aee mai vedù l teater de Navalge tant pien de jent per n conzert jazz« – à dit l diretor artistich Enrico Tommasini, zenza sconer sia sodesfazion: na gran endesfida é stata venta, ajache n investiment desche chel per portèr Scofield te Fascia no l é da pech.

E l é stat vent ence chest an l’endesfida de conjobièr musega de livel internazionèl con chela ladina. En vender ai 15 la sala Heilmann del Museo ladin era piena e rèsa per l conzert del componist e pianist badiot Alex Trebo, che adum col chitarist Manuel Randi l à portà dant i toc de sie beliscim ultim album »Talèa«: toc olache l son di doi strumenc se enterza o i va a una moscian n afiatament straordenèr, apontin desche n »innesto« botanich, e che con la braura di doi musizisć mena te atmosferes dassen da marevea.

Na gran lauda donca ai musizisć de noscia tera, che no i despèr per nia, alincontra i ge dèsc n valor enjontà a n program de livel internazionèl desche chel del Dolomiti Ski Jazz, e na lauda ence al diretor artistich Enrico Tommasini da Moena, che l se desmostra semper a l’auteza de la spetadives.  (Lucia Gross)