La Usc di Ladins

Tel meis de mèrz n om de zirca cincanta egn de naa talièna l era do a jir coi schi co la familia sui portoes del Belvedere, apontin sul portoi numer 1 Sas Becé-Belvedere. De colp l se à sentù mèl, la femena l’à chiamà l 112 ativan la prozedura de socors sui portoes. L om é stat rianimà sul post e portà con l elicoter al ospedèl Santa Chiara de Trent olache l é stat operà per aneurisma zerebral.

L’operazion de emergenza é stata vidèda dal Corp de Polizia e da Davide Ricci Picciloni da Dèlba, volontèr del Socors Alpin de la stazion Auta Fascia e socoridor per la sozietà privata Ski Patrol. Chesta Sozietà da chest an la se cruzia de dèr sie contribut con profescionalità ti intervenc de socors sui portoes che, per via del gran numer de schiadores i vegn domané semper più de spes.

Chest intervent de socors l é stat dassen ecezionèl e de gran delicateza: te pec seconc i agenc de la Ski Patrol i é rué sul post coi polins e l prossach de rianimazion, l é stat chiamà sobito l 112 che, aldò de la informazions ciapèdes, l à fat levèr l elicoter. Endèna l cher del om no aea più batit, ma col massaje cardiach se é stac bogn de tegnir i parametres staboi fin a canche l é ruà l'equipe di dotores del elicoter del 112 da Trent.

L é stat na operazion delicata, che ampò raprejenta un di tenc socorsc che ogne dì é stac porté inant sui portoes de gra soraldut a la profescionalità di socoridores: n lurier de squadra percacent che contribuesc a la segureza generèla de duc chi che va coi schi.  (vr)