La Usc di Ladins

Bal dla Jonëza da Paur a San Martin
En sabeda ai 20 d’aurí él festa a San Martin de Tor, por recordé i 20 agn dla Jonëza da Paur
La Jonëza da Paur da San Martin de Tor festejëia en chësc ann i 20 agn dla Uniun y porchël é düc dër bel inviá a festejé deboriada, en sabeda ai 20 d’aurí dales 19:30 inant, te palestra da San Martin. Por de buna musiga fistidiëia »Die Jungen Pseirer«, i »VolxBrass« y DJ Temptation X.
Por chi che ó se gode na buna cëna en compagnia, él la poscibilité da prenoté na mësa. Chësc é da fá anter i 15 d’aurí al numer 342 6190531!
Braia de coran y diendl é sambëgn bëgnodüs.

Cuartet d’archëc
Düc é dër bel inviá al teater da rí »Cuartet d’archëc«

• 
•  

View the embedded image gallery online at:
https://www.lausc.it/manifestazions-y-evenc/26878-manifestazions-atuales-speziales#sigProId394d2d5ebc

(Das Streichquartett) de Szöke Szakall sot ala rejia de Anna Palfrader, cun la traduziun tl ladin de Matteo Rubatscher
L’Uniun Teater de Badia s’la conforta da ves presenté chësc toch da rí y ves inviëia a öna dles 5 rapresentaziuns tl salf dla Ciasa Jan Batista Runcher a San Linert: la premiera é en sabeda ai 20.04.24 dales 20:00. Les atres rapresentaziuns é: domënia ai 21.04. dales 17:00, mercui ai 24.04. dales 20:00, sabeda ai 27.04. dales 20:00, domënia ai 28.04. dales 17:00. Les prenotaziuns vëgn tutes sö al 328 0984630, danter les 18:30 y les 22:00.
Al jobelnëia por os Carlo Bernardi, Nadine Dapoz, Gabriel De Giovanni, Magdalena Lerchegger, Gustav Mangutsch, Giuvani Pitscheider, Daniel Rubatscher, Anna Tavella, Daniela Valentin.

Santa Mëssa por düc i apascioná dla munt
En domënia ai 14 d’aurí dales 10:00 te dlijia da Corvara, cun benedisciun di rucsoc y por perié do la benedisciun da jí sö por munt
T’la conforteste ince da tö da pié indô ia sö por munt, sëgn che i jun cuntra la bela sajun? Da podëi amiré les belëzes de nosta natöra y da te sintí plü dlungia a nosc Creatur? Por le pröm iade vëgnel metü a jí ince chiló da nos na »mëssa dla munt« (Bergmesse), ponsada por düc i apascioná dla munt.
Le Cor de Dlijia da Corvara te inviëia en domënia ai 14 de aurí dales 10:00 tla dlijia dl Sacher Cör de Gejú a Corvara. Ví ince tö y no te desmentié da te tó para le rucsoch: al gnará benedí tratan la funziun adöm cun chël de düc i presënc. Jödapé de dlijia ciafaraste ince n pice Crist de lëgn cun na oraziun da te tó para sö por munt. Les spënores de bona man ti jará ai omi dl Aiüt Alpinisć Alta Badia.

Ginastica de prevenziun
Le Consëi de Formaziun Badia organisëia n curs de ginastica por prevení le me de spiné
Le curs vëgn tigní ai 17 y ai 24 d’aurí dales 20:00 ales 21:15, te palestra dla scora me­sana a La Ila.
Referënta dl curs é la fisio­terapista Albina Pescol­ler, che insi­gnará eserzizi saurisc da fá ince a ciasa.
Prenotaziuns danfora pro Margit al numer 340 3438709.
Organisaziun: Consëi de formaziun Badia.

Mostra »Flotte Flitzer« dla scolina Salieta
L Circolo–Lia Mostra d’Ert nvieia ala mostra de veiculi »Flotte Flitzer – na tiza da sgors«, fac dai mutons y dala mutans dla scolina Salieta, che unirà metui ora dai 17 nchin ai 21 de auril tl self dla Lia Mostra d’Ert
L proiet »Flotte Flitzer« ie stat na ucajion per renfurzé la cumpetënzes tecniches dla mutans y di mutons. La tecnica ie n ciamp a chël che i pitli ne ti vën nia tan saurì permez, ma che ti plej dassënn.
Do avëi fat na furmazion, à la maestres dla scolina giapà truep material, coche pitli motores, cioi de veicui, rodes da dënz, patries, pitla lumes, fii eletrics, magnec, eliches y n.i. Sëuraprò àn abinà adum materiai da rezitlé sciche bostli, bozes de plastica, struplons, cuiertli, pitla scatules. Cun chisc materiai à i mutons y la mutans pudù lascé lauré si criatività, realisan–deberieda cun n grant de si familia– si veicul persunel: na tiza da sgors. Chësc proiet ie stat na forma scialdi bela de cunlaurazion cun la families che à purtà de biei fruc. La mostra sarà davierta dal mierculdi nchin al vënderdi, dala 14:00 nchin la 18:00 y de sada y dumënia, dala 10:00 nchin la 12:00 y dala 16:00 nchin la 18:00.

Vinzentinum: iubilé cun conzert
Ai 18 d’aurí n conzert particolar cun Manuel Randi y Alex Trebo, por festejé le iubilé dla Fondaziun dl Vinzentinum
En chësc ann vëgnel recordé i 10 agn dla Fondaziun »Vinzentinum pro futuro«, metüda en pe da Michael Seeber dla firma Leitner, sciöche sostëgn por stipendiums a scolares y scolars dl Vinzentinum. Por festejé chësc pröm compliagn toronn, vëgnel organisé n conzert d’ezeziun, cun Manuel Randi y le musizist da San Martin Alex Trebo. L’apuntamënt é por en jöbia ai 18 d’aurí dales 19:30, tl Vinzentinum a Porsenú. Entrada por spënora lëdia, al vá debojëgn da s’anunzié, sot ala plata www.vinzentinum.it

Nosc uciei – na imerscion artistica tla natura
Tl Tublà da Nives vëniel giaurì ncuei, vënderdi ai 12 de auril dala 20:00, na mostra dla Lia Uciei Gherdëina per mparé a cunëscer i uciei de nosc raions
La Lia Uciei Gherdëina ie na lia jëuna che se dà ju cun i uciei, i tieres y la plantes. La finamira dla lia ie dantaldut chëla de mparé a cunëscer deberieda y stravardé la flora y fauna dl luech.
Cun chësta mostra uëlen pité na imerscion da deplù pertes tl mond spetaculer y desferënt dl’ornitologia- na mostra che uel vester n jol de fantajia, ulache i:la vijitadëures possa ntënder la natura tres i uedli dl’ert, ti mustran al mond y ti metan daujin la diverscità y la belëza di uciei. L dëssa nce vester n’ucajion per se ispiré a na respunsabltà per mantenì chësta criatures tan faszinëntes y l habitat ulache les viv.
L sarà da udëi lëures de Rut Bernardi, Alberto Boschetti, Franz Canins, Caroline Comploi, Egon Comploi, Arnold Holzknecht, Albert Moroder, Gustav Perathoner, Gregor Prugger, Giuseppe Rumerio, Roland Senoner, Christian Verginer, Adolf Vinatzer, Johannes Wassermann.
La mostra resta davierta nchin ai 1 de mei, uni di ora dl lunesc dala 16.00 nchin la 19.00.
Ai 1 de mei uniràl metù a jì na jita ornitologica per jì a ti cialé ai uciei che viv te nosc raion.