La Usc di Ladins

I dac ofiziai che la Provinzia de Trent porta dant vigni dì te la conferenza stampa ne disc che al scomenz de chesta setemaèna te Fascia l’era jà passa 150 persones ciapèdes dal virus.

I numeres dic fora da l’assessora Stefania Segnana cresc vigni dì, ence se ti ultimes dis somea che l smaorament l tache a esser mender. En sabeda ai 28 i dèsc tel comun de Cianacei 61 positives, a Ciampedel 23, a Mazin 7, a Sèn Jan 48, a Soraga 9 e a Moena 14, en dut ti 6 comuns de Fascia i é donca 162.

L’é da dir che tel sistem de rilevazion metù a jir da la PAT no duc chisc i à fat l tampon, ma duc chi che à sintoms da Covid 19 e i é stac apede a na persona malèda i vegn conscidré positives.

Apede a chisc n’é ampò de etres (se pel calcolèr 3 o 4 persones per ogneun di positives) che é a cèsa en carantèna, magari zenza nesciun sintom, e n’é ence n muie che da Covid-19 i varesc.

Fosc fossa ampò benfat lascèr sù chesta sort de “boletin de vera” che fèsc demò crescer la “tema de l’untor” e vardèr duc con sospet. I controi che nesciugn vae stroz zenza besegn i vegn fac enseghit, no demò da polins e carabinieres, ma ence dai studafech, che i disc fora per megafon che duc cogn stèr a cèsa. Ge vel respetèr la normes, l’é la soula vida che aon per ferèr l virus, ma vigniun cogn pissèr dantaldut a sé enstes, recordan che duc podassane esser portatores del virus enceben zenza sintoms e podassane esser nos a ge l tachèr sù ai etres, donca cognon se comportèr aldò.

Fin ades l’é stat ofizialmenter 4 morc per o con coronavirus te Fascia, duc sora i 80 egn. De etres é morc chisc dis te val per de autra rejons. Per i parenc l’é stat, apede a la manconia, l dolor de no poder ge dèr na sepoltura tel braciacol de la comunanza. Se strenjon spiritualmenter entorn a ic te chisc momenc tant grieves. 



Foto: L Comun de Cianacei con la scrita che envìa duc a stèr te sia majon.

 (Lucia Gross)