L ef l é l simbol per ezelenza de la Pèsca e l é ence simbol de la vita che se renova e augure de fecondità. No l é Pèsca zenza eves e defat i dis dant del dì de Pèsca l é tradizion entenjer e depenjer i eves, per i donèr ma ence da durèr per pechenèr.
L’Union di Ladins de Fascia chest an à pissà de endrezèr n cors per emparèr a entenjer i eves descheche fajea nesc veies duran i fiores e la erbes che vegn te pra. L cors, che é stat tegnù en vender ai 22 de mèrz te tobià de la Ciasa de la Moniaria, olache te pech temp se tramudarà la sociazion, à avert i apuntamenc de l’Aisciuda Ladina 2024. L president Fernando Brunel, ensema a Letizia Soldà, che à fat studies de èrt e l’à la pascion per l dessegn, ge à moscià a n grop de na dejina de partezipanc co se enjignèr de bie eves depenc e encolorii.
Dant de dut Letizia ge à spiegà co fèr a i sbetèr: se ge fèsc doi picoi bujes sul cuf e sul piz e con na siringa se ciucia fora la rossa e l bianch che l é daite, fossa miec ence i netèr fora con aga e ajé percheche dapò no i puze.
Fernando e Letizia ge à dapò moscià co i depenjer, coi lampostil o coi colores a acrilich. Letizia à spiegà ence co durèr i colores naturèi e l’à tout ca i pigmenc: l bol del Latemar e l brun fascian, per moscèr coche n’outa vegnia durà la teres mescèdedes ensema a la rossa de ef. I partezipanc à depent i eves con la resa fascènes, con fiores de pra, con cheres, steiles, o auter.
De più su La Usc stampèda de en vender ai 29 de mèrz. (Monica Cigolla)
I eves da Pèsca, entenc e depenc
L’Union di Ladins à orì l’Aisciuda Ladina con n cors per emparèr a encolorir i eves con erbes e colores naturèi.
Galaria retrac
View the embedded image gallery online at:
https://www.lausc.it/valedes-ladines/fascia/26805-i-eves-da-pesca-entenc-e-depenc#sigProIdd14df27e8c
https://www.lausc.it/valedes-ladines/fascia/26805-i-eves-da-pesca-entenc-e-depenc#sigProIdd14df27e8c