La Usc di Ladins

L’ega é stada la tematica che á acompagné l’ativité dl Consëi de formaziun d’Al plan ti ultims dui agn. L’impuls é gnü dl 2021, canche an á odü che Al Plan metô man d’invern da stenté cun l’ega da bëre. Insciö án orü traté la tematica sot a deplü aspec. Al é gnü organisé serades de informaziun, referac, spazirades, n concurs cun les scores.
L’ann passé él spo gnü metü a jí n quiz sura döt le comun, olache les porsones ê inviades da respogne a 35 domandes y se fá pinsiers sön l’ega y süa importanza. Al quiz á tut pert 86 porsones: 61 d’Al Plan, 19 da La Pli y 6 da Rina. La porsona plü vedla che á tut pert é dl 1934, la partezipanta plü jona é nasciüda dl 2017. Ci che mancia ciamó, é la premiaziun; chësta gareta en sabeda ai 23 de merz dales 4 domisdé te salf dles manifestaziuns d’Al Plan, olache le proiet "ega" vá ince a piz. Y chësc cun na iniziativa particolara: na cercia de eghes deboriada cun le idrosommelier André Hofer, olache an podará sintí y conësce les desfarënzies danter les eghes de Fanes, dla Ücia Lavarella, Pederü, Al Plan y les eghes di bagns d’Al Plan, Valdander y Rumestluns. Le presidënt dl Consëi de formaziun nes dij co che chisc dui agn sot al sëgn dl’ega é jüs, co che an dess s’imaginé la degustaziun dles eghes y al nes cunta ince de n proiet che an á por le dagní: ressané le morin da Iun, che é l’ultim morin tl paisc d’Al Plan.

La intervista podëise lí t’La Usc di Ladins di 15 de merz  (pablo)