La Usc di Ladins

I patruns de na sozieté de imprëstaschi dl’Alta Badia á fat plüra pro i Carabiniers, do che ai sospetâ che al foss porsones che se metess ia adascusc scioldi dl incas. Insciö é piada ia na ativité de inrescida bindebó ampla, portada inant dai carabiniers dl’unité operativa dla compagnia da Bornech.
Tl tëmp de apresciapüch n mëis él gnü valuté les imajes dles telecameres, analisé documënc informatics y ince desfiré n’ativité de control personal. Insciö á i Carabiniers identifiché dui colaboradus dl’ativité suradita, che s’â studié fora n modus operandi che ti pormetô da stramudé les modalités de incas y desvié insciö le sistem de contabilité dl’ativité. Cun chësta furbaria ési stá bogn da se mëte a saul – te ma trëi mëisc – apresciapüch 50.000,00€, che é insciö sparis dales entrades dl’ativité. Tratan les percuisiziuns tles abitaziuns á i Carabiniers recuperé za. 8.000 euro en contanc, che ê ascognüs tl sotletët dl’ativité, olache un di dui dependënc sojornâ. Insciö án ciafé na proa implü dl reat. I dui dependënc é gnüs dá dant al’autorité iudiziara, por ativité de arobaria agravada. Aladô dles normes atuales, vëgn les döes porsones aratades inozëntes, cina che al ne gnará desmostré legalmënter le malfat, cun na sentënza dan signoria.  (pablo)