La Usc di Ladins

”Paisc da Nadé”: chësc l’inom che an á chirí fora a San Ciascian por la iniziativa nöia de n pice marcé, che dess contribuí da porté plü vita tl zënter fora por l’Advënt y sura les festes da Nadé, mo ince da cherié te paisc y tla jënt n pü’ de atmosfera nadalina. Le ”Paisc da Nadé” é gnü daurí ofizialmënter en vëndres ai 4 de dezëmber y jará inant cina ai 6 de jená 2016, vigni de dales 16.00 ales 19.00. L’idea - á cunté le promotur dla iniziativa Andy Pertot - é nasciüda l’ann passé, canche an n’â rodunt da chësc tëmp ciamó degüna nëi sön pista mo gnanca na iniziativa particolara da pité te paisc. Insciö s’á deplü privac metü adöm por mudé chësta situaziun. Cun le ”Paisc da Nadé” pón sëgn s’la spaziré tl zënter stlüt al trafich danter plü ciasotes de lëgn cun produc desvalis, na bela decoraziun da Nadé cun lëgns infornis y chentli che verd, la gherlanda d’Advënt y la cripele de lëgn en grandëza naturala. Döt vëgn completé cun iniziatives de cornisc: pla daurida á soné n grup dla Müjiga da San Ciascian, ai 5 de dezëmber vëgnel San Micurá y pro deplü serades él preodü musiga da Nadé sonada dal ví. Nos sun jüs ala daurida cun benedisciun, de chëra che i ves pitun valgünes impresciuns.

Deplü sön la daurida dl ”Paisc da Nadé” ves cuntarunse spo t’La Usc stampada.




 (pablo)