La Usc di Ladins

Tel mond l é 56 conflic atives, l numer più aut mai dombrà da la fin de la seconda vera mondièla. L é l dat che vegn fora da la edizion 2024 del ‘Global peace index’ che ne disc ence che 92 Paijes i é empegné te conflic sorafora si confins, che l indesc del livel mesan de la pèsc l é piorà del 0,56% e che l impat economich a livel global del 2023 é stat de 19 mile miliarc de dolares. Epura chisc numeres no ne tocia, aon la vera sun usc de cèsa e l é desche se assane usà, no ge dajon più abade. 

Per chest tegnir auta l’atenzion su la vera col recordèr che che à padì nesc veies che à cognù jir a combater e morir, l é emportant e doverous. En mèrtesc ai 25 de jugn, tel chèder di evenc per recordèr i 10 egn da canche l é stat avert la mostra su La Gran Vera, te teater de Navalge l é stat portà dant l recital »Uh, sta guerra maledetta e bestia!« na raprejentazion pissèda, metuda ensema e portèda dant da Fabio Chiocchetti jà del 2014 proprio per l’avertura de la medema mostra. 

Enstadì sun paladina i atores de »I Amisc del Teater«: Mario Gallarati, Günther Pezzé, Roberto Dassala, Francesco Dellantonio e Tommaso Faré ge à dat ousc a Battista Chiocchetti del Moro, Giacomo Sommavilla de Piaz, Simone Chiocchetti Moro, Vigilio Jellico Mantino, Carlo Jellici Garber e Giuseppe Pettena che dal front oriental (1914-1918) ge scrivea a chi de cèsa per ge contèr olache i era rué, coche i stajea, i orores de la mort, de la fam, de la malaties e perscin de la perjon, ma ence la gran forza de soraviver e jir deretorn, semper col pensier a chi de cèsa. Chi de cèsa, belapontin, che padia ogne outa che no ciapèa neves, ogne outa che valgugn cognea partir, ogne outa che i sentia de valgugn che era mort sot la bombes, sot l fech, o che l front se arvejinèa semper de più. Testimonianzes toutes dal ‘Piccolo Diario di Caterina’ de Caterina Pezzé Batesta che é stata interpretèda da Rosanna March.

De più su La Usc stampèda de en vender ai 5 de messèl.  (Monica Cigolla)