La Usc di Ladins

Se ai 18 de mé n pont de la Radunanza del CEP aea cognù vegnir sburlà ajache i sozi prejenc no era assà per poder mudar l statut, la promozion fata per la radunanza straordenara di 27 de jugn à abù n ejit sorafora ogne previjion: sun 2.276 sozi, ben 909 i era prejenc, 564 de persona e 345 travers la delega. La couda de chi che spetaa de vegnir registré per jir te tendon ruaa fin vin strada de Meida e la radunanza, perveduda per le ot da sera, à podù pear via demò da mese le diesc. Dapò aboncont la spiegazion e la votazion é jite inant belebon spediente.

Dant l diretor general Dino Detomas e dapò l president Giancarlo Pederiva e la notara Elena Corso i à deschiarì la sostanza di trei mudamenc che vegnia proponet. Chel de maor emportanza, al articol 3 sul fin mutualistich del CEP, domanaa de jontar ite na frasa olache vegn dit che l é pervedù de poder meter en doura forme de partezipazion ence a sozietà fora de val, sul teritorie de la Talia.

De più su La Usc stampèda de en vender ai 5 de messèl.  (Lucia Gross)