La Usc di Ladins

Una de chele burte neve che no se volessa sentir se à slarià fora da vender sera te val. Antonio Zulian, più cognosciù col inom de Tone Cuz, entorn le 7 da sera tel vegnir ju tel bosch sora Soraga do esser jit e se tor la part de legna l à perdù l control del meso che l vidaa: l trator l é rodolà ju per na erta e l lo à schicià. L é stat alertà ence l jolier, se à mobilità Studafech e compagnes del Socors da Mont, ma nesciugn à più podù far nia. 

Tone Cuz l aea 64 egn e l luraa da spangler, l era cognosciù soraldut per so gran empegn tel Socors da mont, olache l é stat atif per n muie de egn. Al dolor de chi de ciasa se jonta chel de duc i amisc rampinadores, del Socors, de la Sociazion di Refuges, de la jent da mont ladina.

Insnet e doman da sera da le 8 vegn dit l rosar te gejia parochiala de Poza, Tone Cuz l é te la capela di morc te la cortina de Poza e en lunesc da doman l vegnarà tramudà te gejia, olache da le 11 sarà l obito.