Una vita intiera a se pensà de chel che ‘l é stà, a inparà e studià, a insegnà a chi outre. El so amor par ra farata e ra vecia Ferrovia delle Dolomiti: el libro del 1994
In Anpezo manciarà Evaldo Gaspari Moroto. Manciarà ra so stories, chel che el contaa, che ‘l aea vedù o che ‘l aea inparà da outre, da ‘l vecio in fora. Algo de chesto so saé ‘l aea contà, ai 10 de agosto del 2016, anche a ra parsones che và a scotà i »Mercui de ra cultura ladina«, che ra Union de i Ladis d’Anpezo parecia ogni an d’istade. Evaldo ‘l aea acaro de parlà a ra śente, de contà chel che el saea.
Gaspari el saea soralduto de ra vecia sozietà Ferrovia delle Dolomiti, de ra farata nasciuda del 1921, morta del 1964, co i trene che viaśaa inaante e indrio, da Toblach in Anpezo, fin a Calalzo in Cadore. De duto chesto ‘l aea scrito un libro, stanpà da Athesia del 1994, par i zento ane de ra Casa rurale,
trenta ane da canche i aea sarà ra farata. L é un libro gran, de 274pajines, con inze tropa fotografies, cartes, projete, mapes topografiches. Domegna ai 17 de maśo 1964 Gaspari ‘l é montà su chel treno, fin in Cadore, co ‘na cinepresa, da toi śo chel viaśo. Dapò ‘l é tornà inze in machina, par vede moe ‘l ultimo treno, da dasera. Ai 30 de maśo ‘l ea in stazion, par vede moe ‘l ultimo locomotor. (MDM)
De plu tla edizion stampeda de La Usc di Ladins o sun l e-paper a paiament www.lausc.it/e-paper
