La Usc di Ladins

Te chesta sajon da d’invern dalbon fora de anter, condizionèda dal coronavirus che l’é dò che fèsc anulèr la maor pèrt di apuntamenc ence per chel che vèrda l sport, dajon cont de doi garejèdes de bal sui feres states amò de firé, l trofeo Pattini col cuore e la 3^ garejèda del Campionat Trivenet a Pèdua. Per endèna la garejèdes é apontin sospenudes e ence i alenamenc, aldò de l’indicazion de la Federazion.

Ai 15 e 16 de firé la sozietà Artistico Ghiaccio Fiem à metù a jir a Ciavaleis la 7^ edizion del trofeo Pattini col cuore, na garejèda intersozièla che à vedù la partezipazion de beleche 300 balarins sui feres dai 6 ai 18 egn, 2 gropes de sincronisà e n grop coletif.

Ai 22 e 23 de firé a Pèdua l’é stat l Campionat Trivenet 3^ garejèda fascia nazionèla  e interregionèla. A chesta competizion à tout pèrt desvalives atlec de l’Artistico Ghiaccio Pavei d’arjent: Arianna Verra, Emily Fosco, Giovanni Pezzei, Matteo Marchioni e Elisa Planchensteiner. Giovanni e Emily à tout dant con coraje e determinazion a sia pruma competizion te la Prenovice interregionèla, enceben la dificoltèdes de la garejèda, ruan respetivamenter 9° e 15^. Te la medema categoria Arianna é ruèda 7^ dò aer fat per la pruma outa n salchow dopie en garejèda. Terzo sciaier del podie per Matteo te la Basic novice enveze garejèda sospenuda da n provediment del Coni per Elisa, 4^ tel short program.  (Cri.m)