La Usc di Ladins

Ai 29 de firé l é la giornèda mondièla de la malaties rères, dì cernuda pissan apontin a chest dì ‘rèr’, che l rua demò n’outa vigni 4 egn, apontin desche chela patologies de spes desmentièdes ence da la scienza ajache les colpesc n numer de persones bas, no più che 5 vigni 10.000.   

Jà da vèlch an l Comun General de Fascia con la conseiera de procura Mirella Florian e si Servijes sozièi à volù empeèr la lumes sun chest grief problem che tocia desvaliva persones ence te noscia val.   

Ence chest an l é stat endrezà la scomenzadiva dal titol »Lum empeèdes su la malaties rères« con doi scontrèdes metudes a jir dai Servijes sozièi e l Spazio Argento del CGF en colaborazion coi assessores di Comuns enciarié al sozièl e con la Scola de Fascia e l’Azienda Provinzièla per i Servijes Sanitères.

Na pruma ocajion informativa vegn metuda a jir proprio en jebia ai 29 de firé, da mesa les 3 domesdì te Sala Grana de la Sorastanza de la Scola Ladina de Fascia a Sèn Jan.
En sabeda ai 2 de mèrz na seconda scontrèda vegnarà metuda a jir a na vida mingol più informala da les 3 domesdì, ló dal Garnì Villa Mozart te strèda Roma 27 a Cianacei tel chèder del projet Trame.

De più su La Usc stampèda de en vender ai 23 de firé.  (LG)